Value Meal

ARAW  ng  Biyernes, katapusan na ng buwan. May isang oras na siyang nakapila sa tapat ng isang condominium sa bahagi ng P. Ocampo Street sa Vito Cruz.

Kung tutuusin, araw iyon ng sahod pero talagang matumal ang pasada.  

Walong daang piso pa lamang ang kaniyang kinita sa halos labin anim na oras na pagmamaneho at kailangan pa niyang magdagdag ng P200.00 para sa boundary at  P500.00 sa gas.

Kung may sobra siyang kikitain bago ang oras ng garahe bukas ng umaga, iyon lang ang kaniyang maiuuwi para sa pamilya.

“Saan?” tanong nito sa babaeng nagbukas ng passenger’s seat.

“Sa may Quiapo po  manong” magalang na sagot ng pasahero na sa tantiya niya ay nasa early 30’s lang ang edad.

“Pero manong, pwede po bang saglit tayo ng Jollibee, pagtawid natin diyan sa Taft, dadaanan ko lang ang boyfriend ko,” sabay turo sa tinutukoy na direksyon.

“OK, po ma’m,” paunlak nito.

Pasado alas onse na ng gabi, ayon sa digital na orasan sa dashboard.

Nang matapat sila sa binabanggit na food chain, lumapit naman kaagad sa taxi ang isang lalaki na may hawak na take-out. Umikot pa ito sa likod ng sasakyan para ma-upo sa backseat, katabi ng babae.

“OK na manong, tayo na,” sabi ng lalaki.

Wala ng trapik sa oras na iyon pero marami pang tao sa lansangan. Mga estudyante na ginabi ng uwi karamihan. Galing siguro ng gimik, naisip niya.

“Manong kain tayo,” yaya ni babae, sabay abot ng  French fries.

Nangangamoy sa loob ng taxi ang nakakagutom na burger at French fries.

“Ay huwag na po, OK lang po,” nahihiyang tugon nito sabay lunok ng malagkit na laway.

Sa totoo lang, kanina pa niya tinitiis ang gutom. Nalipasan kasi siya ng tanghalian kaya maaga siyang kumain ng hapunan. Isang order ng mami at 3 piraso ng buns, apat na basong tubig.

Tubig lang ang madalas niyang pampatawid-gutom.

Hamburger, French fries, chicken joy, spaghetti.

Dapat siyang magtipid. Lima ang kanilang anak at nasa third year high school na ang panganay.

Pangarap nitong kumuha ng kursong education sa college. Sa gayon daw, libre niyang maturuan ang mga kapatid.

Hamburger, French fries, chicken joy, spaghetti.

Paakyat na sila ng Ayala Bridge nang maghayag ng intensyon ang kanyang pasahero.

“Brod, pera-pera lang, hold-up ‘to!” sabi ng lalaki sabay diin ng balisong sa leeg ng biktima.

Mabilis ang kamay ng lalaki.  “Sir, huwag naman. Wala pa akong kita, sir!” nanginginig ang boses nito.

“’Taragis, lumang style na iyan!” galit na sabat ng babae.

Naramdaman nito ang pagtagas ng dugo sa kanyang leeg. Mainit. Mahapdi.

“Sir, sir, huwag sir!” nagmamakaawa na siya.

“Ito na sir, kunin ‘nyo na ang pera ko sir, kahit itong sasakyan, huwag niyo lang akong patayin ma’m,” naiiyak na sa takot ang pobre.

“Lima po ang anak ko sir, may pamilya po ako.”

Ginoo, luwasa ako Ginoo!” dasal ng kaniyang isip.

Paglagpas nila ng Gen. Solano, sa bandang unahan lang ng isang gasoline station, “Tabi mo diyan!” utos ng babae at hindi pa man tuluyang nakahinto ang taxi, tumalon na agad ang dalawang suspeks.

Nang makalayo na sa lugar, kinuha kaagad nito sa kanyang bulsa ang dalang Good Morning towel at ibinalot ito sa leeg para maagapan ang dumudugong sugat.

“Uurrgh!!” “Putang ina nila! “Putragis!” nanginginig ang buo niyang katawan.

Matapos ipa-blotter ang insidente at malapatan ng first-aid ang kanyang sugat, nagpasya siyang bumalik na sa kanilang garahe.

“O, anong nangyari sa iyo?” salubong kaagad ng nagtatakang operator.

“Nahold-up ako sir. ‘eto nga’t nasaksak pa ako. Buti na lang hindi malalim.”

“Ah, so ngayon wala kang boundary, ganon? ‘Yan ba ang gusto mong sabihin, ha?” may bahid pagdududa sa usisa ng operator.

“Nahold-up ka kagabi, kaya wala kang iri-remit na pera?”

“Kayong mga drayber, kaya hindi kayo umaasenso diyan sa kinalalagyan ninyo dahil sa ugali ninyong ‘yan eh!”

“’Taragis, lumang style na iyan!”

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s